ភ្នំពេញ៖ ប្រធានាធិបតីចិន លោក ស៉ី ជិនពីង បានបង្ហាញនូវជំនឿចិត្តលើភាពជាអ្នកដឹកនាំរបស់លោក ហ៊ុន ម៉ាណែត នឹងជឿថាលោក ហ៊ុន ម៉ាណែត នឹងក្លាយជានាយករដ្ឋមន្ត្រីដ៏ល្អមួយសម្រាប់ប្រទេសកម្ពុជា។
ថ្លៃនៅក្នុងសន្និសិទសារព័ត៌មានអំពីដំណើរទស្សនកិច្ចរបស់សម្ដេចតេជោទៅកាន់ប្រទេសចិននារសៀលថ្ងៃទី១១ ខែកុម្ភៈ ឆ្នាំ២០២៣ នេះលោក សុខ ចិន្តាសោភា បានឱ្យដឹងថា ប្រតិភូដែលបានអមដំណើរសម្ដេចតេជោទៅកាន់ប្រទេសចិនលើកនេះគឺមានចំនួនច្រើនដែលរួមមានទាំងកូនទាំងពីររបស់សម្ដេចតេជោគឺលោក ហ៊ុន ម៉ាណែត និងលោក ហ៊ុន ម៉ានី ផងដែរ។
លោកបានបន្ថែមថានៅក្នុងដំណើរទស្សនកិច្ចនោះក្នុងពេលដែលសម្ដេចតេជោនិងប្រតិភូអញ្ជើញចូលជួបប្រធានាធិបតីប្រទេសចិន លោក ស៊ី ជីងពីន ពេលដែលចាប់ផ្ដើមប្រជុំលោកបានលើកឡើងអំពីសមត្ថភាពរបស់លោក ហ៊ុន ម៉ាណែត នឹងបានជឿជាក់អំពីការបន្តវេននៃគណបក្សប្រជាជនដែលលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគតផងនោះ។
កូនប្រុសច្បងរបស់នាយករដ្ឋមន្ត្រី សម្ដេចតេជោ ហ៊ុន សែន លោក ហ៊ុន ម៉ាណែត ត្រូវបានគណបក្សប្រជាជនបោះឆ្នោតជ្រើសតាំងជាបេក្ខជននាយករដ្ឋមន្ត្រីនៅថ្ងៃអនាគតកាលពីថ្ងៃទី២៤ ខែធ្នូ ឆ្នាំ២០២១។ លោក ហ៊ុន ម៉ាណែត បច្ចុប្បន្នជាអគ្គមេបញ្ជាការរងកងយុទ្ធពលខេមរភូមិន្ទ និងជាមេបញ្ជាការទ័ពជើងគោក លោកមានឋាន្តរស័ក្កិជាឧត្តមសេនីយ៍ឯក (ផ្កាយបី) នៃកងទ័ពជាតិ។
ជាមួយគ្នានឹងការចាប់អារម្មណ៍ពីប្រធានាធិបតីចិនចំពោះលោក ហ៊ុន ម៉ាណែត សម្រាប់លោក ហ៊ុន ម៉ានី ក៏ទទួលបានចំណាប់អារម្មណ៍ពីប្រធានសភាចិនផងដែរ។ ប្រធានសភាចិនបានស្គាល់និងដឹងពីលោក ហ៊ុន ម៉ានី ដែលជាយុវជនមួយដែលមានសមត្ថភាពនិងជឿថាការដឹកនាំយុវជនរបស់លោក ហ៊ុន ម៉ានី គឺពិតជាមានប្រសិទ្ធភាពនិងដឹកនាំយុវជនកម្ពុជានាថ្ងៃអនាគតបាន៕